වැලිකඩ බන්ධනාගාරය තුළ දී සිදු වූ පහරදීමේ සිද්ධිය සම්බන්ධව පූර්ණ පරීක්ෂණයක් පවත්වා වාර්තාවක් ඉදිරිපත් කරන ලෙස කොළඹ මහේස්ත්‍රාත් අධිකරණය පොලිසියට නියෝග කර තිබේ.

මේ පිළිබඳ පූර්ණ වාර්තාවක් ලබන 30 වැනිදා ඉදිරිපත් කරන ලෙස බොරැල්ල පොලිසිය ඉදිරිපත් කළ වාර්තාවක් සලකා බැලූ කොළඹ ‍අතිරේක මහේස්ත්‍රාත් ප්‍රහර්ශා රණසිංහ මහත්මිය නියෝග කළාය.

අධිකරණය මඟින් ලබා දුන් සෝදිසි වරෙන්තුවක් මත වැලිකඩ, මැගසින් හා කොළඹ බන්ධනාගාර පරීක්ෂාවට ලක් කළ බව ඉන් සඳහන් කර ඇත. මෙම පරීක්ෂාවේ දී ජංගම දුරකථන බැටරි කැබලි සහ මත් කුඩු මිලිග්‍රෑම් 30ක් පමණ සොයා ගත් බව පොලිසිය අධිකරණයට ඉදිරිපත් කළ වාර්තාව මගින් සඳහන් කර තිබේ.

බන්ධනාගාරයේ ඇති වූ ගැටුම පිළිබඳව රහස් පොලිසිය මගින් විශේෂ පරීක්ෂණයක් ආරම්භ කර ඇති බවත් පොලිසිය අධිකරණය හමුවේ ප්‍රකාශ කරනු ලැබීය. මෙම පරීක්ෂණ වල ප්‍රගතිය දැක් වෙන වාර්තාවක් ලබන 30 වැනිදා අධිකරණයට ඉදිරිපත් කරන ලෙස ඉදිරිපත් වූ කරුණු සලකා බැලූ මහේස්ත්‍රාත්වරිය පොලිසියට නියෝග කර සිටියාය.